ხელნაწერთა ეროვნულ ცენტრში ქართველოლოგიური საზაფხულო სკოლა, სახელწოდებით "ქართული დამწერლობა", ოფიციალურად გაიხსნა.

როგორც ცენტრის დირექტორმა ბუბა კუდავამ განაცხადა საზაფხულო სკოლა ქართული დამწერლობითა და ხელნაწერი მემკვიდრეობით დაინტერესებული უცხოელებისთვის გაიხსნა.

"სკოლის კულტურულ-საგანმანათლებლო პროგრამა საქართველოს სხვადასხვა კუთხეში 9 ექსკურსიას მოიცავს. იმ უცხოელ სტუდენტს, რომელიც ჩვენთან ისწავლის, ბოლნისში, დმანისში, მცხეთაში, გელათში, ბათუმსა და დავით გარეჯში საგანმანათლებლო ექსკურიას მოვუწყობთ. ასევე, ქართული კალიგრაფიისა და ქართული ხელნაწერის გამოფენები მოეწყობა", - განაცხადა ხელნაწერთა ეროვნული ცენტრის ხელმძღვანელმა.

საზაფხულო სკოლის გახსნას საქართველოს განათლებისა და მეცნიერების მინისტრის მოადგილე ნოდარ სურგულაძეც დაესწრო.

"საზაფხულო სკოლაში მონაწილეობის სურვილი 15 სხვადასხვა ქვეყნიდან გამოთქვეს: აშშ, პოლონეთი, გერმანია, რუსეთი, უკრაინა, ლიტვა, ბულგარეთი და იტალია... აქედან პროექტით გათვალისწინებული 12 სტუდენტი შეირჩა. ძალიან მნიშვნელოვანი და კარგი პეოქტია, აქ ჩვენი ქვეყნის დამწერლობისა და კულტურული მემკვიდრეობის გაცნობა ხდება მსოფლიოსთვის", - განაცხადა სურგულაძემ.

პროექტი 15 სექტემბერს დასრულდება.

პროექტი განათლებისა და მეცნიერების სამინისტროს მხარდაჭერითა და შოთა რუსთაველის ეროვნული სამეცნიერო ფონდის დაფინანსებით ხორციელდება.
ghn.ge