დღეს, 27 ნოემბერს, 13:00 საათზე, თბილისის მოდის კვირეულის მეოთხე დღეს, თბილისი ივენთ ჰოლში დამწყები დიზაინერები თავიანთ მინიკოლექციებს წარმოადგენენ. 17 ახალბედა ხუთ-ხუთი ნამუშევრით წარდგება ჟიურის წინაშე, რომელიც მათგან ერთ გამარჯვებულს გამოავლენს. პროექტი მიმდინარეობს თბილისის სამხატვრო აკადემიის, გოეთეს ინსტიტუტისა და ბრიტანეთის საბჭოს მხარდაჭერით. სწორად ეს ორი საერთაშორისო კულტურულ-საგანმანათლებლო ორგანიზაცია დააწესებს პრიზებს გამარჯვებულისთვის.

20:00 საათზე თბილისის მოდის კვირეულის ბოლო, მეოთხე საღამოს, "თბილისი ივენთ ჰოლი" ორი კოლექციის ჩვენებას უმასპინძლებს. სტამბულიდან თბილისში სპეციალურად თბილისის მოდის კვირეულზე დაბრუნებული რამაზო რომა პირველად გამართავს გრანდიოზულ შოუს, რომელზედაც სპეციალურად უკრაინიდან ჩამოსული, ხუთი მოდელი გამოვა. ასევე, რამაზოს ჩვენებაზე პოდიუმზე ვიხილავთ „მის შვიდი კონტინენტი 2010"-ს, ოქსანა კლოჩკოვას, რომლის თმასა და მაკიაჟზე სპეციალურად ამ დღისთვის ჩამოსული, ბაქოს ყველაზე სახელგანთქმული სტილისტი, ანგან აკაგჩიევი იზრუნებს.

21:00 საათზე თბილისი ივენთ ჰოლში გაიმართება ტანდემის „უტა-ლევანი" ჩვენება, რომელიც ნიუ-იორკში და ბუენოს აირესში მომუშავე ორ ქართველ დიზაინერს აერთიანებს.

დაბოლოს, 22:30 საათზე, კვირეულის ბოლო ჩვენებას საგამოფენო ცენტრი „ექსპო ჯორჯია" უმასპინძლებს. დათუნა სულიკაშვილის კოლექციის ჩვენებას 500-ზე მეტი სტუმარი დაესწრება და ის საკმაოდ უჩვეულო სივრცესა და ვითარებაში გაიმართება.

შეგახსნებთ, რომ თბილისის მოდის მეხუთე კვირეული კომპანია "ჯეოფეშენის" ორგანიზებით 24 ნოემბერს გაიხსნა.