ანაკლიაში დასრულდა საქართველოს ქალ მოჭადრაკეთა 69-ე ჩემპიონატი, რომელშიც დამაჯერებლად გაიმარჯვა და პირველად მოიპოვა ქვეყნის უძლიერესი ქალი მოჭადრაკის ტიტული საერთაშორისო დიდოსტატმა ბელა ხოტენაშვილმა. მან 11 ტურში 8.0 ქულა მოაგროვა. მეორე ადგილზე გავიდა მერი არაბიძე, რომელიც ბელა ხოტენაშვილს 1 ქულით ჩამორჩა. მესამე ადგილი დაიკავა ნინო ბაციაშვილმა.

აღნიშნულმა სამეულმა საქართველოს ქალთა 70-ე ჩემპიონატის უმაღლეს ლიგაში მონაწილეობის უფლება მოიპოვა. ბელა ხოტენაშვილს კი სწრაფ ჭადრაკსა და ბლიცში მსოფლიოს ქალთა ჩემპიონატის (ქ. ბათუმი, 30.05/06.06-2012წ.) საგზურიც ერგო. ბელა ხოტენაშვილი და მერი არაბიძე 2013 წლის ევროპის ქალთა ჩემპიონატისთვის დაფინანსდებიან და ბაციაშვილთან ერთად სტიპენდიაზედაც იქნებიან წარდგენილნი.

ბელა ხოტენაშვილი საქართველოს ტექნიკური უნივერსიტეტის ბიზნეს-ინჟინერინგის ფაკულტეტის ეკონომიკისა და ბიზნესის მართვის დეპარტამენტის მაგისტრანტია. მისი მეუღლე, საერთაშორისო ოსტატი მალხაზ სულაშვილი კი -საქართველოს ტექნიკური უნივერსიტეტის დოქტორანტი.