საქართველოს ტექნიკური უნივერსიტეტის ხელბურთელთა გუნდი ევროპის ჩემპიონი გახდა. ესპანეთში სტუ-ის ხელბურთელთა გუნდმა უნივერსიტეტებს შორის ევროპის ჩემპიონატი მოიგო. ქართველმა ხელბურთელებმა ფინალში ხორვატები დაამარცხეს და ევროუნივერსიადის თასი მოიპოვეს.
ესპანეთის ქალაქ კორდობაში ჩატარდა პირველი საუნივერსიტეტო თამაშები, სადაც ევროპის ქვეყნების 2000-მდე სპორტსმენი სპორტის 10 სახეობაში იბრძოდა პირველობისთვის. საქართველოდან ევროპის პირველ საუნივერსიტეტო თამაშებზე ხელბურთსა და ფუტზალში საქართველოს ტექნიკური უნივერსიტეტისა (სტუ) და სახელმწიფო უნივერსიტეტის (თსუ) გუნდები მონაწილეობდნენ.
ქართული გუნდები ესპანეთში უნივერსიტეტების დაფინანსებითა და საქართველოს საუნივერსიტეტო სპორტის ფედერაციის მხარდაჭერით გაემგზავრნენ.
