საქართველოს ილია ჭავჭავაძის სახელობის მწიგნობართა ასოციაციის შენობაში პროფესორ არჩილ ფრანგიშვილისა (სტუ-ის რექტორი) და პროფესორ ოლეგ ნამიჩეიშვილის წიგნის _ “საუბრები მეცნიერების ფილოსოფიის შესახებ” _ პრეზენტაცია გაიმართა.
"საუბრები მეცნიერების ფილოსოფიის შესახებ" ფართო მკითხველისთვის საუბრის ფორმით დაწერილი წიგნია. იგი განიხილავს მეცნიერების სპეციფიკას როგორც ცოდნის სისტემას, სულიერი წარმოებისა და სოციალური ინსტიტუტის ფორმას; აანალიზებს მეცნიერების განვითარების კანონზომიერებებს, მის სტრუქტურას, მეცნიერული შეცნობის დონეებსა და მის მეთოდოლოგიას; ავლენს განსხვავებებს საბუნებისმეტყველო და ჰუმანიტარულ მეცნიერებათა შორის, მათი ფორმირების ეტაპებსა და სათანადო მეთოდების თავისებურებებს; უჩვენებს, როგორ წყდება მოცემული პრობლემები მეცნიერების ტანამედროვე დასავლური ფილოსოფოსების მიერ.
"საუბრები მეცნიერების ფილოსოფიის შესახებ" განკუთვნილია მაგისტრანტებისა და დოქტორანტებისთვის, მეცნიერების ისტორიის, ფილოსოფიისა და მეთოდოლოგიის პრობლემებით დაინტერესებული მკითხველისთვის.
წიგნი Ltd. NANO XXI-ის ფინანსური მხარდაჭერით გამოიცა. რედაქტორია მიტროპოლიტი ანანია ჯაფარიძე. რეცენზენტები არიან აკადემიკოსები _ როინ მეტრეველი და ვლადიმერ ჭავჭანიძე.