დედამიწაზე მთვარის ნაწილობრივი დაბნელება მოხდა, რომელის დროსაც დედამიწამ მთვარის დისკოს ნახევარი დაფარა. ამის შესახებ უცხოური მედია იუწყება.
ამ მოვლენაზე სრულად დაკვირვება ავსტრალიის, ინდონეზიის, ახალი ზელანდიისა და წყნარი ოკეანის კუნძულების მოსახლეობას შეეძლო. ჩრდილოეთ და სამხრეთ ამერიკის წყნარი ოკეანის სანაპიროებიდან მთვარის დაბნელების მხოლოდ ნაწილი გამოჩნდა. რუსეთის შორეული აღმოსავლეთის მცხოვრებლებმა კი ამ მოვლენის მხოლოდ დასასრული დაინახეს.

კოსმოსური სააგენტო "ნასას" ინფორმაციით, დაბნელება 26 ივნისს, გრინვიჩის დროით 08:57 (თბილისის დროით 12:57) საათზე დაიწყო, უმაღლეს წერტილს 11:38 (თბილისის დროით 15:38) საათზე მიაღწია და 12:59 (თბილისის დროით 16:59) დასრულდა.

მთვარის წინა დაბნელება 2009 წლის 31 დეკემბერს დაფიქსირდა. წელს, 21 დეკემბერს, მოსალოდნელია მთვარის სრული დაბნელება, რომელიც ყველაზე უკეთ ჩრდილოეთ ამერიკიდან გამოჩნდება.
Ipn.ge