საქართველოს ფეხბურთის ფედერაციის პრეზიდენტად ზვიად სიჭინავა აირჩიეს. 33 დელეგატიდან არჩევნებში მონაწილეობა 30-მა მიიღო. მათ პრეზიდენტის თანამდებობაზე სიჭინავას ერთხმად დაუჭირეს მხარი. ზვიად სიჭინავა საქართველოს ფეხბურთის ფედერაციას 4 წლის განმავლობაში უხელმძღვანელებს.

როგორც სიჭინავამ ჟურნალისტებთან საუბრისას აღნიშნა, ფედერაციის პრეზიდენტობა საკმაოდ დიდი პასუხისმგებლობაა, რადგან ქართულ ფეხბურთში ბევრი პრობლემაა და მომავალი ოთხი წლის განმავლობაში ყველაფერი გაკეთდება როგორც საფეხბურთო ინფრასტრუქტურის, ასევე შიდა ჩემპიონატების განვითარებისთვის.

მისი შეფასებით, ეროვნულმა ნაკრებმა წარმატებას, რომ მიაღწიოს ნაკრების მთავარ მწვრთნელად მუშაობა თემურ ქეცბაიამ უნდა განაგრძოს, რომელსაც კონტრაქტი ორი წლის ვადით გაუხანგრძლივდება.

ფეხბურთის ფედერაციის XIX საარჩევნო ყრილობა სასტუმრო "ჰოლიდეი ინში" 22 იანვარს ჩატარდა. კენჭს ფეხბურთის ფედერაციის პრეზიდენტობაზე მხოლოდ ერთი კანდიდატი, ზვიად სიჭინავა იყრიდა.
ghn