დღეს, 9 მაისს, ფაშიზმზე გამარჯვების დღეა. 9 მაისი პოსტსაბჭოთა სივრცის ზოგიერთ სახელმწიფოში, მათ შორის საქართველოში, მეორე მსოფლიო ომში ფაშისტურ გერმანიაზე გამარჯვების გამო აღინიშნება. 1945 წლის 9 მაისს მოსკოვში, წითელ მოედანზე, გაიმართა ამ გამარჯვების აღსანიშნავი სამხედრო აღლუმი. 9 მაისი დღესასწაულად გამოცხადდა 1945 წლის 8 მაისს, სსრ კავშირის უმაღლესი საბჭოს პრეზიდიუმის ბრძანებულებით, ხოლო უქმე დღედ - 1965 წლის 26 აპრილს.

8 და 9 მაისი გაერო-ს გენერალურმა ასამბლეამ მეორე მსოფლიო ომის მსხვერპლთა ხსოვნის თარიღად 2004 წელს დააწესა.

ევროპამ ფაშიზმზე გამარჯვების დღე 8 მაისს იზეიმა. ცნობილია, რომ უპირობო კაპიტულაციის აქტს 1945 წლის 8 მაისს, ევროპის დროით 22 საათსა და 45 წუთზე მოეწერა ხელი. ამ დროს საბჭოთა დედაქალაქში, მოსკოვში, ასევე საქართველოში, უკვე 9 მაისი იდგა, ამიტომ გამარჯვების დღე პოსტსაბჭოთა სივრცეში 9 მაისს აღინიშნება.