/GHN/ იტალიის საელჩო დევნილი ბავშვებისთვის ახალ პროექტს - "არგო" იწყებს. პროექტის პრეზენტაცია 11 დეკემბერს, 10.00 საათზე თბილისში, "ევროპულ სახლში" მოხდება (თავისუფლების მოედანი, ლესელიძისა და დადიანის კუთხე).
პროექტის დახმარებით, შეიქმნება დევნილი ბავშვების ელექტრონული მონაცემთა ბაზა, რომელიც ხელმისაწვდომი იქნება როგორც იტალიელი ბიზნესმენებისთვის, ისე არასამთავრობო ორგანიზაციებისა და სახელმწიფო უწყებებისთვის. ბაზის მიხედვით, ნებისმიერ დაინტერესებულ იტალიელს საშუალება ექნება, ბავშვებისთვის სხვადასხვა სახის პროექტები დაგეგმოს და ინვესტიციები განახორციელოს. მონაცემთა ბაზის შესაქმნელად იტალიის საგარეო საქმეთა სამინისტრო 20 000 ევროს გამოყოფს.
ღონისძიებას დაესწრება იტალიის სრულუფლებიანი ელჩი საქართველოში ვიტორია სანბალი, ლტოლვილთა და განსახლების მინისტრი კობა სუბელიანი და სხვა ოფიციალური პირები.