საქართველოს ტექნიკურ უნივერსიტეტში ლიტუანისტიკის ცენტრი გაიხსნა. სტუ-ის ადმინისტრაციული შენობის ნ. ნიკოლაძის მცირე სააქტო დარბაზში გაიმართა ლიტვური ენის შემსწავლელი ცენტრის გახსნასთან დაკავშირებული ღონისძიება. შეხვედრა საქართველოში ლიტვის რესპუბლიკის ელჩმა იონას პასლაუსკასმა გახსნა.
გახსნას ესწრებოდნენ საქართველოში ლიტვის საელჩოს კანცელარიის უფროსი რასა ინდრიუნაიტე-ბარკალაია, საქართველოს ტექნიკური უნივერსიტეტის რექტორის მოადგილე მეცნიერების დარგში ზურაბ გასიტაშვილი, რექტორის მოადგილე სწავლების დარგში ლევან კლიმიაშვილი, სტუ-ის ფაკულტეტების დეკანები, პროფესორ-მასწავლებლები და სტუდენტები.
სიტყვით გამოვიდნენ ლიტვიდან სპეციალურად მოწვეული პროფესორი ვიდას კავალიაუსკასი, სტუ-ის სტუდენტები. გამომსვლელებმა საქართველოში ლიტუანისტიკის ცენტრის გახსნისა და ზოგადად, ქართულ-ლიტვური კონტაქტების გაღრმავების აუცილებლობაზე ისაუბრეს.
იონას პასლაუსკასის განცხადებით, ნებისმიერ სტუდენტს როგორც საქართველოს ტექნიკური უნივერსიტეტიდან, ისე სხვა სასწავლო დაწესებულებებიდან, ასევე ყველა მსურველს, რომელსაც უნდა, შეისწავლოს ლიტვური ენა, ექნება საშუალება, უფასოდ დაესწროს ლექციებს. სალექციო კურსს წაიკითხავს ლიტვიდან სპეციალურად მოწვეული პროფესორი ვიდას კავალიაუსკასი.
აღნიშნული ინიციატივა ეკუთვნის საქართველოს ტექნიკურ უნივერსიტეტს, დაფინანსება კი განახორციელა ლიტვის განათლებისა და მეცნიერების სამინისტრომ.
