ერთიანი ეროვნული გამოცდებისათვის რეგისტრაცია დღეს იწყება. გამოცდების ეროვნული ცენტრის ვებგვერდზე (www.naec.ge) საინფორმაციო ცნობარი განთავსდა, რომლითაც აბიტურიენტმა არჩევნის გაკეთებისას უნდა იხელმძღვანელოს.

"ცნობარში მოცემულია რეგისტრაციის ინსტრუქცია, ხშირად დასმული კითხვები, საგანმანათლებლო პროგრამების ჩამონათვალი. ცნობარი ასევე დაიბეჭდება გაზეთში ,,ახალი განათლება", - აცხადებენ გამოცდების ეროვნულ ცენტრში.

მათი ცნობით, 2013 წლის ერთიანი ეროვნული გამოცდებისათვის რეგისტრაცია 20 აპრილს დასრულდება. 5 აპრილს, 15:00 საათზე კი, გამოცდების ეროვნულ ცენტრში აბიტურიენტთათვის ღია კარის დღის ჩატარება იგეგმება.