საქართველოს ტექნიკური უნივერსიტეტის სატრანსპორტო და მანქანათმშენებლობის ფაკულტეტის მექანიკის ინჟინერიის საწარმოო ტექნოლოგიების დეპარტამენტი ღრმა მწუხარებით იუწყება, რომ გარდაიცვალა პროფესორი ოთარ მგალობლიშვილი.

ოთარ მგალობლიშვილი დაიბადა 1940 წლის 25 მაისს ქ. თბილისში. 1958-1963 წლებში იყო სპი-ს მექანიკა-მანქანათმშენებლობის ფაკულტეტის სტუდენტი. 1963-64 წლებში სპი-ს ლითონსაჭრელი ჩარხების კათედრის უფროსი ლაბორანტი, 1964 წლიდან მანქანათმშენებლობის ტექნოლოგიის კათედრის ასპირანტი, შემდგომ წლებში ასისტენტი და უფროსი მასწავლებელი. 1973 წელს დაიცვა საკანდიდატო დისერტაცია.

1975-1976 წლებში სოლფორდის უნივერსიტეტის (მანჩესტერი, დიდი ბრიტანეთი) სტაჟიორია. 1984 წლიდან მოღვაწეობდა შტუტგარდის უნივერსიტეტში.

1995 წლიდან თანამშრომლობდა ჯონ მურის უნივერსიტეტთან, 1998 წლიდან ამავე უნივერსიტეტის საინჟინრო და ტექნოლოგიური მენეჯმენტის ფაკულტეტის მეცნიერ-თანამშრომელი იყო.

1999 წელს მიენიჭა უნივერსიტეტის პროფესორის წოდება. 2008 წლიდან იყო ამავე უნივერსიტეტის პროფესორ-კონსულტანტი.

ოთარ მგალობლიშვილი იყო ცნობილი მეცნიერი მექანიკის ინჟინერიის დარგში, წლების განმავლობაში მექანიკის ინჟინერიის საწარმოო ტექნოლოგიების დეპარტამენტის თანამშრომლებთან ერთად აქტიურად მოღვაწეობდა საერთაშორისო სამეცნიერო გრანტებით დაფინანსებულ პროექტებში.