/GHN/ იტალიაში მილანის ქართულ-იტალიური საზოგადოების _ "სამშობლო - გულით სატარებელი" _ პრეზიდენტი ნინო ყაუხჩიშვილი გარდაიცვალა. ამის შესახებ ინფორმაციას დიასპორის საკითხებში საქართველოს სახელმწიფო მინისტრის აპარატის პრესსამსახური ავრცელებს.
ნინო ყაუხჩიშვილი ცნობილი ქართველი მეცნიერის, სიმონ ყაუხჩიშვილის ძმის შვილი იყო. ნინო ყაუხჩიშვილის მამა 1921 წელს საქართველოს ხელისუფლებასთან ერთად უცხოეთში წავიდა. თავად ნინო ბერლინში დაიბადა. მან მთელი ცხოვრება ემიგრაციაში გაატარა. 2008 წლის 26 სექტემბერს იტალიაში, მილანში, ნინო ყაუხჩიშვილის თაოსნობით იტალიურ-ქართული საზოგადოება "სამშობლო - გულით სატარებელი" დაარსდა.
ამ ორგანიზაციის საქმიანობა არაკომერციული ხასიათისაა და მიზნად ისახავს იტალიაში მცხოვრებ ქართველთა ეროვნული თვითმყოფადობის შენარჩუნებას, იტალიაში ქართული ენისა და კულტურის პროპაგანდას, ქართველ და იტალიელ ხალხებს შორის მეგობრული, კულტურული ურთიერთობების განვითარებასა და გაღრმავებას.