5-6 ივნისს საქართველოს ტურიზმის ასოციაცია (GTA) ვარძიის კომპლექსის მიმდებარე ტერიტორიაზე “ვარძიის სათავგადასავლო ტურნირ 2010-ს" მართავს. ტურნირში ოცი 6-კაციანი გუნდი მიიღებს მონაწილეობას, ხოლო შეჯიბრება სამ დისციპლინაში - სირბილში, ველორბოლასა და ჯომარდობაში - გაიმართება. ჯგუფში 6 მონაწილეა (აქედან სამი სირბილში მიიღებს მონაწილეობას, სამი - ველორბოლაში და ბოლოს ექვსივე ჯომარდობაში).

გამარჯვებული გუნდები სპორტული მაღაზიების ფულადი ვაუჩერებით დასაჩუქრდებიან (ვაუჩერების ბიუჯეტი 6000 ლარი). I ადგილი: 3000 ლარის ვაუჩერი, II ადგილი: 2000 ლარის ვაუჩერი, III ადგილი: 1000 ლარის ვაუჩერი.

სპორტული ღონისძიება მიზნად ისახავს საზოგადოებაში ჯანმრთელი ცხოვრების წესის დანერგვას, სამცხე-ჯავახეთის რეგიონის პოპულარიზაციას და ისეთი ტურისტული სეგმენტის განვითარებას, როგორიცაა საფეხმავლო, ველოტურები და ჯომარდობა. პროექტის ფარგლებში დაგეგმილია შემდეგი ძირითადი აქტივობები:
1. ძირითადი შეჯიბრება- ტრიატლონი (სირბილი, ველორბოლა, რაფტინგი),
2. გასართობი ღონისძიება - მწვადის საღამო მუსიკის თანხლებით,
3. შეჯიბრება მკლავჭიდში,
4. ლუდის ფესტივალი,
5. გამარჯვებულთა დაჯილდოების ცერემონია,
6. ტურნირის მონაწილეთა და ჟურნალისტების უფასო ჯომარდობა მტკვარზე,
7. ტურნირის დასრულების შემდეგ პირველად საქართველოში 2-დღიანი ჯომარდობა ვარძიიდან თბილისამდე.

გარდა ამისა, მონაწილეებისა და სტუმრებისთვის მოეწყობა ვარძიის კომპლექსის უფასო დათვალიერება, რაც ასევე მუზეუმ-ნაკრძალის პოპულარიზაციას ისახავს მიზნად.

ღონისძიების ორგანიზატორების განცხადებით, პროექტი “ვარძიის სათავგადასავლო ტურნირი" რეგიონალური ტურიზმის განვითარებისთვის გადადგმული უდიდესი ნაბიჯია, რომელიც მნიშვნელოვნად გაზრდის ვიზიტორთა რაოდენობას სამცხე-ჯავახეთის რეგიონში და ხელს შეუწყობს სათავგადასავლო ტურიზმის განვითარებას.

ტურნირს 2009 წელს ჩაეყარა საფუძველი და ის ყოველ წელს გაიმართება.