საქართველოს თავისუფალი სტილით მოჭიდავეთა ახალგაზრდულმა ნაკრებმა 24-25 ივლისს ბუდაპეშტში ჩატარებულ მსოფლიო ჩემპიონატზე 2 ოქროს, 1 ვერცხლისა და 2 ბრინჯაოს მედალი მოიპოვა .

როგორც საქართველოს სპორტისა და ახალგაზრდობის საქმეთა სამინისტროს პრესსამსახურში აცხადებენ, გუნდიდან ყველაზე შედეგიანად ვლადიმერ ხინჩეგაშვილმა (55 კგ) და დავით ხუციშვილმა (74 კგ) იჭიდავეს, სეზონის უმთავრესი შეჯიბრი წაუგებლად ჩაამთავრეს, ყველა შეხვედრა მოიგეს და მსოფლიო ჩემპიონები გახდნენ.

ჩემპიონატზე ვერცხლის მედალი საქართველოს ნაკრებიდან უმსუბუქეს წონაში - 50 კილოგრამში მოჭიდავე ლაშა ტალახაძემ მოიპოვა. ბრინჯაოს მედლების მფლობელები კი ევროპის მოქმედი ჩემპიონი, მძიმეწონოსანი გიორგი საკანდელიძე (120 კგ) და 60 კგ. წონით კატეგორიაში მოჭიდავე თენგიზ ჩოჩიშვილი გახდნენ.

საერთო გუნდურ ჩათვლაში საქართველოს ახალგაზრდულმა ნაკრებმა 49 ქულა დააგროვა და მსოფლიოს ჩემპიონატზე მესამე ადგილი დაიკავა.
იპნ.გე