სმარტფონების (ე. წ. ჭკვიანი ტელეფონი) მსოფლიო გაყიდვები მიმდინარე წლის მესამე კვარტლაში 4,2%-ით გაიზარდა და რეკორდულ მოცულობას 43,3 მილიონ ერთეულს მიაღწია. აღნიშნულ ინფორმაციას კომპანია IDC-ის სპეციალისტები აქვეყნებენ. ანალიტიკოსები სმარტფონებზე გაზრდილ სამომხმარებლო მოთხოვნას სმარტფონების მრავალფეროვანი შესაძლებლობებით ხსნიან.
ამას გარდა, მათი მტკიცებით, მომხმარებელთა ინტერესი აღნიშნული მოწყობილობების მიმართ ოპერაციულმა სისტემა Google Android-მაც გაზარდა. კომპანიის ექსპერტები სმარტფონების ბაზრის ზრდას სამომავლოდაც პროგნოზირებენ.
ბაზრის ლიდერად 38%-იანი მაჩვენებლით Nokia რჩება, მან 16,4 მილიონი სმარტფონი გაყიდა. მეორე ადგილს Research in Motion-ის BlackBerry იკავებს. მისი წილი სმარტფონების მსოფლიო ბაზარზე 8,2 მილიონი მოწყობილობის რეალიზაციის შედეგად 19%-ს შეადგენს. ლიდერთა სამეულს კი Apple ასრულებს. მან 7,4 მილიონი iPhone გაყიდა და ბაზრის 17% დაიკავა. მომდევნო პოზიციებზეა HTC (5,6%) და Samsung (3,5%).