სილქნეტი სილქტივის მომხმარებლებს საზაფხულოდ უფასო ვიდეოთეკას სთავაზობს. НТВ-ის არხების გათიშვასთან და ახალ შეთავაზებასთან დაკავშირებით, 15 ივნისს, 11:00 საათზე, „სილქნეტის" ვაკის სერვისცენტრში (ჭავჭავაძის გამზ.22) კომპანიის ხელმძღვანელობა პრესკონფერენციას გამართავს.

სადემონსტრაციოდ წარმოდგენილი იქნება VoD (Video on Demand) სერვისი - ვიდეოთეკა, სადაც შესულია ქართული, რუსული და უცხოური კინოპროდუქციის 400-მდე ნიმუში. ვიდეოთეკა დაყოფილია თემატურად და აქვს გადახვევისა და დაპაუზების ფუნქციები.

„სუპერტივის საჩივრის საფუძველზე საქართველოს ტერიტორიაზე უკლებლივ ყველა მოქმედ საკაბელო მაუწყებელს აეკრძალა НТВ-ის არხების რეტრანსლირება. სილქნეტიც იძულებულია, მომხმარებელს შეუჩეროს ამ საკმაოდ რეიტინგული არხებთან წვდომა. ამიტომ სილქ.ტვ-ის მომხმარებელს ვთავაზობთ ქართული ბაზრისთვის ახალ, უპრეცედენტო სერვისს „ვიდეოთეკას". ამ ეტაპზე ფილმები შესაძლებელია დაუკვეთოს სილქ.ტვ-ის მომხმარებელმა სრულიად უფასოდ, ნებისმიერ დროს", - აცხადებენ კომპანიაში.

კომპანიამ ინტერაქტიული ტელევიზია რამდენიმე თვეა, რაც აამოქმედა. სილქ.ტვ-ის სერვისით 14 ათასი მომხმარებელი სარგებლობს თბილისსა და ბათუმში. ტელევიზია მიეწოდება როგორც ოპტიკური ტექნოლოგიით, ისე DSL-ქსელით.