/ინტერპრესნიუსი/ მთავრობისა და პარლამენტის შეუთანხმებლობის გამო, თამბაქოს ნაწარმის ნებისმიერ გათამაშებაში მონაწილეობა, აკრძალული რჩება.
გასული წლის ბოლოს, პარლამენტმა “საქართველოში თამბაქოს კონტროლის შესახებ“ საქართველოს კანონში ცვლილებები შეიტანა, რომლის მიხედვით, 2009 წლის 1-ელი სექტემბრიდან თამბაქოს ნაწარმის ყველანაირ გათამაშებაში მონაწილეობა უნდა აკრძალულიყო.
გაზაფხულზე კი, მთავრობამ მხოლოდ ნაწილობრივი აკრძალვის პროექტი შეიტანა პარლამენტში, რასაც დეპუტატების ნაწილის, კერძოდ კი, ვიცე-სპიკერ იგი წერეთლის უკმაყოფილება მოჰყვა და პროექტის განხილვა გაჭიანურდა.
შედეგად, ცვლილებაში ცვლილების შეტანა ვერ მოესწრო და პირველი სექტემბრიდან ძალაში შევიდა მუხლი, რომლის მიხედვით “აკრძალულია თამბაქოს ნაწარმის გათამაშების, ლატარიის, ლოტოს, მომგებიანი ან სხვა სახის აზარტული თამაშის საშუალებით დარიგება ან/და ამგვარ ღონისძიებებში თამბაქოს ნაწარმის საშუალებით მისი განაწილებით მონაწილეობა”.
ნაწილობრივ აკრძალვასთან დაკავშირებით პროექტი კი პარლამენტში ამ დრომდე შეჩერებულია და დეპუტატები მისი განხილვის ვადებს ვერ აკონკრეტებენ.
აღნიშნული ცვლილებით, ლატარიის, მომგებიანი და აზარტული თამაშების საშუალებით, მხოლოდ თამბაქოს ნაწარმის დარიგება უნდა აიკრძალოს. შესაბამისად, სანამ პარლამენტი და მთავრობა შეთანხმებას მიაღწევენ, თამაბაქოს ნაწარმის ნებისმიერ გათამაშებაში მონაწილეობა უკანონო იქნება.