|
9-09-2009, 14:56
კახეთის რეგიონში ახალი სასწავლო წლისთვის 27 საჯარო სკოლა შერემონტდა. ამის შესახებ რადიო "ჰერეთს" პრეზიდენტის რწმუნებულმა კახეთში გიორგი ღვინიაშვილმა განუცხადა.
მისი თქმით, სკოლებში ძირითადად გამოიცვალა კარ-ფანჯრები და სახურავები. ამასთან გუბერნატორი ამბობს, რომ თელავში ერთადერთი სკოლა იყო დარჩენილი, რომელსაც სარემონტო სამუშაოები დიდი ხნის მანძილზე არ ჩატარებია, ახლა კი სკოლის სრული რეაბილიტაცია მოხდა.
"ლაგოდეხის რაიონის სოფელ ვარდისუბანში, გურჯაანის სოფელ მელაანში, საგარეჯოს სოფელ ლამბალოსა და ახმეტის ერთ-ერთ სოფელში სკოლის სრული რეაბილიტაცია იგეგმება", - განაცხადა გუბერნატორმა.
როგორც ცნობილია, საქართველოს მასშტაბით საზაფხულო არდადეგების შემდეგ სასწავლო პროცესი 14 სექტემბერს განახლდება. |
|
