საქართველოს ტექნიკურ უნივერსიტეტის წარმომადგენლებმა ბაიროითის უნივერსიტეტსა და საარბრიუკენის ეკონომიკისა და ტექნიკის უნივერსიტეტთან ურთიერთთანამშრომლობისა და ორმხრივი პარტნიორობის შესახებ მოლაპარაკებები გამართეს. მოლაპარაკებები საქართველოს ტექნიკური უნივერსიტეტის რექტორის, არჩილ ფრანგიშვილის თაოსნობით მიმდინარეობდა. მას აწარმოებდა ორგანიზაციული მართვის დეპარტამენტის ასოცირებული პროფესორი ეკატერინე თურქია.

მოეწყო ოფიციალური შეხვედრები საარბრიუკენის ეკონომიკისა და ტექნიკის უნივერსიტეტის კოლეგებთან - რექტორი პროფ. ვოლფგანგ კორნეტცი, პროფ. ტატიანა კიონიგი (პასუხისმგებელი პირი); ბაიროითის უნივერსიტეტის კოლეგებთან - პროფ. შტეფან იაბლონსკი (ვიცე-პრეზიდენტი სასწავლო დარგში), პროფ. არმინ ჰაინემანი (ინტერნაციონალური ოფისისა და ინსტიტუციური კონტაქტების ხელმძღვანელი).
პროფ. ე. თურქიამ უნივერსიტეტებში ჩაატარა მოხსენებები საქართველოს ტექნიკური უნივერსიტეტის აკადემიური და სამეცნიერო (საინფორმაციო ტექნოლოგიებში) მიმართულებების შესახებ.

შეთანხმების შედეგად, გაგრძელდა პარტნიორობის ხელშეკრულება საარბრიუკენის ეკონომიკისა და ტექნიკის უნივერსიტეტთან; დაიწყო ახალ კოოპერაციაზე შეთანხმება ბაიროითის უნივერსიტეტთან, რაც ითვალისწინებს მულტიდისციპლინარული (ინფორმატიკა, ქიმია, ბიოლოგია, სამთო-გეოლოგია, ჰუმანიტარული მეცნიერებები) სამეცნიერო-აკადემიური თანამშრომლობის მხარდაჭერას.

საწყის ეტაპზე შეიქმნება საინიციატივო ჯგუფი, რომელიც წარმართავს ორგანიზაციულ საქმიანობას მულტიდისციპლინარული სამეცნიერო მიმართულებების ჩამოსაყალიბებლად. ამ პროცესებს ასევე მხარს უჭერს გერმანიის აკადემიური გაცვლითი სამსახური (DAAD).