ფესტივალი "სტუდენტური დღეები 2012“ თბილისში, კუს ტბის ტერიტორიაზე 16 მაისს ოფიციალურად გაიხსნა. სტუდენტური დღეების გახსნის საზეიმო ცერემონიაში მონაწილეობა საქართველოს ტექნიკური უნივერსიტეტის მუსიკალურმა ჯგუფმა "ურსამაც" მიიღო.

პროგრამის "სტუდენტური დღეები 2012" ფარგლებში სტუდენტებს, რომლებიც სხვადასხვა უმაღლეს სასწავლებელში სწავლობენ, ეძლევათ შესაძლებლობა, წარმოაჩინონ საკუთარი ნიჭი სხვადასხვა მიმართულებით. კონკურსი ჩატარდება როგორც ინდივიდუალურ, ასევე ჯგუფურ ნომინაციებში. გამარჯვებულებს კომპეტენტური ჟიური გამოავლენს.

"სტუდენტური დღეები 2012" ფარგლებში კონკურსები ჩატარდება შემდეგ კატეგორიებში: ხალხური ცეკვა, ხალხური სიმღერა, თანამედროვე ცეკვა, თანამედროვე სიმღერა, იუმორისტული ნომერი, თეატრალური დადგმა, ფოტოგამოფენა, ნახატების გამოფენა, ორიგინალური ნომერი.

პროგრამის დაწყებამდე საქართველოს მასშტაბით უმაღლეს სასწავლებლებში ჩატარდა შიდა შესარჩევი ტურები. "სტუდენტური დღეები 2012"საკონკურსო დღეები სიღნაღში, ქუთაისსა და ბათუმში ერთი კვირის განმავლობაში გაგრძელდება.

შეგახსენებთ, რომ საქართველოს ტექნიკური უნივერსიტეტი სტუდენტური დღეები 2011-ის გამარჯვებულია.