საქართველოს ტექნიკური უნივერსიტეტის ნ. ნიკოლაძის სახელობის სააქტო დარბაზსა და ენერგეტიკისა და ტელეკომუნიკაციის ფაკულტეტის #122 ლაბორატორიაში დღეს გათბობის ენერგოეფექტური სისტემების არმატურის მწარმოებელი კომპანიები "HERZ Armaturen" (ვენა, ავსტრია) და "HERZ Украина" (კიევი, უკრაინა) ტექნიკურ სემინარს და ახალი პროდუქციის პრეზენტაციას ატარებენ

სემინარი საქართველოს ტექნიკური უნივერსიტეტის ენერგეტიკისა და კავშირგაბმულობის ფაკულტეტის დეკანმა გია არაბიძემ გახსნა. HERZ-ის ტექნიკურმა დირექტორმა იგორ ზასედატელევმა კომპანია HERZ-ის ჯგუფის პრეზენტაცია წარმოადგინა და პროექტის მნიშვნელობებზე ისაუბრა.

ამას გარდა, გია არაბიძემ რ. იაუშოვეცის წიგნის “ჰიდრავლიკა – გათბობის გული” პრეზენტაცია გამართა.

შეგახსენებთ: საქართველოს ტექნიკური უნივერსიტეტის მერვე კორპუსში განახლებადი ენერგიის ლაბორატორია 2011 წლის 11 ოქტომბერს გაიხსნა. ლაბორატორია, რომელიც სტუდენტების, პროფესორების და ენერგეტიკის სფეროს სპეციალისტების საერთაშორისო სტანდატებით მომზადებისთვისაა განკუთვნილი, აღჭურვილია მზის ენერგიაზე მომუშავე თანამედროვე წყალგამაცხელებელი სისტემებით, გამოსხივების ფოტოელექტრონული გარდამქმნელებით, თბური ტუმბოთი, მცირე სიმძლავრის ქარგენერატორით და გათბობის მაღალეფექტური ჰიდრავლიკური სისტემით. განახლებადი ენერგიის სასწავლო-კვლევითი ლაბორატორია შეიქმნა საქართველოს ტექნიკური უნივერსიტეტის, ავსტრიული კოპმანია HERZ Armaturen-ის, აშშ-ის საერთაშორისო განვთარების საააგენტოსა (USAID) და საქართველოს საერთაშორისო ენერგეტიკული კორპორაციის ერთობლივი ძალისხმევით. ლაბორატორიის მოწყობილობა, რომელიც კომპლექსური სამუშაოების ჩატარების შესაძლებლობას იძლევა, დამონტაჟდა ავსტრიელი, უკრაინელი და ქართველი სპეციალისტების მიერ. ლაბორატორიაში მიღებული კვლევის შედეგები შექმნის გამოცდილების ბაზას საქართველოში ეკოლოგიურად და ენერგეტიკულად ეფექტური ტექნოლოგიების ფართო გამოყენებისთვის.