ერთიანი ეროვნული გამოცდების ფარგლებში ქართული ენისა და ლიტერატურის გამოცდა დასრულდა. აბიტურიენტებმა ქართული ენისა და ლიტერატურის გამოცდა 1-ელ და 2 ივლისს ოთხ სესიად ჩააბარეს. დღეს, ბოლო სესიაზე, 8620 რეგისტრირებული აბიტურიენტიდან გამოცდაზე 8308 გამოცხადდა. შაბათ-კვირას აბიტურიენტები დაისვენებენ, 5 ივლისიდან კი ერთიანი ეროვნული გამოცდები ზოგად უნარებში ტესტირებით გაგრძელდება.

გამოცდების ეროვნული ცენტრის ხელმძღვანელის მაია მიმინოშვილის განცხადებით, ქართული ენისა და ლიტერატურის ტესტების გასწორება უკვე 3 ივლისიდან დაიწყება.

"ქართულ ენისა და ლიტერატურის ტესტების გასწორებას ყველაზე მეტი დრო სჭირდება. სწორედ ამიტომ ამ საგანში აბიტურიენტთა ნამუშევრების გასწორებას 3 ივლისიდანვე დავიწყებთ", - განაცხადა მიმინოშვილმა.

მისი თქმით, აგვისტოს პირველ რიცხვებში პირველადი შედეგები გამოქვეყნდება, ხოლო 20 აგვისტოსთვის საბოლოო შედეგები იქნება ცნობილი. ერთიანი ეროვნული გამოცდები 1-ელ ივლისს დაიწყო და 23 ივლისს დასრულდება.
ipn