საქართველოს განათლებისა და მეცნიერების მინისტრმა, დიმიტრი შაშკინმა, თბილისის 198-ე საჯარო სკოლის მოსწავლეებს პორტატული კომპიუტერები გადასცა. სპეციალური საგანმანათლებლო საჭიროების მქონე 10-მდე მეორეკლასელი მოსწავლე მათემატიკას, ქართულ ენას, ბუნებას კომპიუტერების გამოყენებით შეისწავლის.

როგორც საქართველოს განათლებისა და მეცნიერების მინისტრმა განაცხადა, გადაწყვეტილება კომპიუტერების გადაცემის შესახებ 3 თებერვალს, სკოლის ახალი შენობის გახსნის შემდეგ მიიღო.

სკოლა სპეციალური საგანმანათლებლო საჭიროებების მქონე მოსწავლეებს ემსახურება. შაშკინმა აღნიშნა, რომ თანამედროვე კომპიუტერული ტექნიკა წარმოადგენს ყველაზე ეფექტურ საშუალებას სპეციალური საგანმანათლებლო საჭიროების მქონე ბავშვების პრობლემების დაძლევაში.

მინისტრის განცხადებით, მიუხედავად იმისა, რომ ახალ სკოლაში ხელის მოტორიკის განვითარებისთვის მოსწავლეებს ყველა პირობა აქვთ შექმნილი და ადაპტირებულ კაბინეტებში უტარდებათ ინფორმატიკის გაკვეთილები, პრობლემა მაინც არსებობს: მოსწავლეთა ნაწილი სოციალურად დაუცველი ოჯახებიდანაა და სკოლაში კომპიუტერზე მიღებულ უნარებს ოჯახში ვერ ამყარებენ. მინისტრის განცხადებით, კომპიუტერები სწორედ ასეთ მოსწავლეებს გადაეცათ.