|
25-02-2011, 20:02
საქართველოს ტექნიკური უნივერსიტეტის საავტომობილო გზების, აეროდრომების, ხიდების და გვირაბების მშენებლობის კათედრას, ცემენტ-ბეტონის ხარისხის განმსაზღვრელი, საერთაშორისო სტანდარტების შესაბამისი ლაბორატორია ექნება.
55 ერთეული, 30 დასახელების ლაბორატორიული ხელსაწყო ტექნიკურ უნივერსიტეტს საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა გადასცა.
ცემენტ-ბეტონის ხარისხის მაკონტროლებელი ლაბორატორიის გადაცემამდე, რეგიონული განვითარებისა და ინფრასტრუქტურის სამინისტრომ ტექნიკური უნივერსიტეტის საავტომობილო გზების, აეროდრომების, ხიდების და გვირაბების მშენებლობის კათედრას ასფალტის ხარისხის განმსაზღვრელი საერთაშორისო სტანდარტების ლაბორატორიაც გადასცა.
ლაბორატორიების გადაცემა იმ მემორანდუმის ფარგლებში განხორციელდა, რომელიც საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტსა და საქართველოს ტექნიკურ უნივერსიტეტს შორის გაფორმდა. მსგავსი ტექნოლოგიური ბაზა ტექნიკურ უნივერსიტეტს აქამდე არ გააჩნდა, რაც სტუდენტების სწავლების ხარისხს პრობლემებს უქმნიდა.
მემორანდუმის ფარგლებში, საქართველოს რეგიონული განვითარებისა და ინფრასტრუქტურის სამინისტრომ, მსოფლიო ბანკის დაფინანსებით გაარემონტა ტექნიკური უნივერსიტეტის საავტომობილო გზების, აეროდრომების, ხიდების და გვირაბების მშენებლობის კათედრის შენობა. სამინისტრო გეგმავს კათედრისთვის ბიბლიოთეკის მოწყობას, სადაც სტუდენტებისთვის საჭირო სახელმძღვანელოები იქნება განთავსებული. |
|
