ერთიან ეროვნულ გამოცდებსა და სამაგისტრო გამოცდებთან დაკავშირებით განათლების სამინისტროს მიერ მიღებული გადაწყვეტილებების სასამართლოში გასაჩივრება მათ მოქმედებას ვერ შეაჩერებს. ამის თაობაზე დამატებით ჩანაწერი "უმაღლესი განათლების შესახებ" კანონში კეთდება.

კანონმდებლობით, განათლებისა და მეცნიერების სამინისტრო უფლებამოსილია, ერთიან ეროვნულ და სამაგისტრო გამოცდებთან დაკავშირებით დაადგინოს საქართველოს ზოგადი ადმინისტრაციული კოდექსით გათვალისწინებულისაგან განსხვავებული ადმინისტრაციული საჩივრის წარდგენისა და განხილვის ვადები.

კანონპროექტით კი დგინდება, რომ სამინისტროს შეეძლება დაადგინოს როგორც საჩივრის განსხვავებული წარდგენისა და განხილვის ვადები, ასევე განსხვავებული წესიც.

ამასთან, იმავე კანონში კეთდება ჩანაწერი, რომ ერთიან ეროვნულ და საერთო სამაგისტრო გამოცდასთან დაკავშირებული განათლებისა და მეცნიერების სამინისტროს გადაწყვეტილებები საჩივრდება სასამართლოში, თუმცა მათი გასაჩივრება სადავო აქტების მოქმედების შეჩერებას არ გამოიწვევს.

კანონპროექტის ავტორი განათლებისა და მეცნიერების სამინისტროა, ინიციატორი კი მთავრობა. მისი განხილვა პარლამენტს ჯერჯერობით არ დაუწყია.
ipn.ge