სრულიად საქართველოს კათალიკოს-პატრიარქმა, უწმინდესმა და უნეტარესმა ილია მეორემ ქართული საოპერო მომღერალი და საზოგადო მოღვაწე პაატა ბურჭულაძე დააჯილდოვა.

საქველმოქმედო საქმიანობაში შეტანილი წვლილისთვის ბურჭულაძეს მართლმადიდებლური ეკლესიის უმაღლესი ჯილდო - წმინდა გიორგის ოქროს ორდენი დღეს, სამების საკათედრო ტაძარში გადაეცა. ცერემონიას, რომელიც ტაძარში საკვირაო წირვის დასრულების შემდეგ გაიმართა, მრევლთან ერთად სინოდის წევრებიც ესწრებოდნენ.

ქართული საოპერო მომღერლის განცხადებით, მისთვის ეს ჯილდო დიდი პატივია, რისთვისაც მან პატრიარქსა და ქართულ საზოგადოებას მადლობა გადაუხადა.

"უბედნიერესი ადამიანი ვარ და ეს არც არის გასაკვირი. მინდა პატრიარქს და სრულიად საქართველოს დიდი მადლობა გადავუხადო. ვეცდები ეს ჯილდო გავამართლო", - განუცხადა ბურჭულაძემ ჟურნალისტებს.

შეგახსენებთ, რომ მომღერლის წმინდა გიორგის ოქროს ორდენით დაჯილდოების შესახებ ილია მეორემ, 25 თებერვალს, ფონდ "იავნანას" საქველმოქმედო კონცერტზე განაცხადა.