"2015 წლისთვის საქართველოში ყველა სკოლა შვედეთისა და ჰოლანდიის სკოლების სტანდარტების შესაბამისი იქნება. ეს არის ჩვენი დაპირება. დაწყებული შენობებიდან, აღჭურვილობით დამთავრებული", _ განაცხადა პრეზიდენტმა მიხეილ სააკაშვილმა საქართველოს პარლამენტში წლიური ანგარიშით გამოსვლისას.

მისი განცხადებით, ბევრი სკოლა თანამედროვე სტანდარტებს ჯერ კიდევ ვერ აკმაყოფილებს. ეს მაშინ, როცა ჩვენი ქვეყნის მომავლის გასაღები განათლებაა. პრეზიდენტის თქმით, სწორედ ამას ეფუძნება, იქნება ჩვენი ქვეყანა პერსპექტიული თუ ჩაიძირება; შევძლებთ თუ არა საქართველოს მოდერნიზაციას, კონკურენტუნარიანი საზოგადოებისა და სახელმწიფოს ჩამოყალიბებას.

"ამიტომ ვაგრძელებთ სკოლების და სასკოლო სისტემების განვითარებას. ვაგრძელებთ კომპიუტერიზაციის და ინტერნეტიზაციის პროგრამებს სკოლებში. ვახორციელებთ პროგრამას, რომლის შედეგადაც ყველა სერთიფიცირებული მასწავლებელი მიიღებს 200-ლარიან დამანატს, ხოლო მასწავლებლების ყველაზე კვალიფიციური ნაწილი _ 25 პროცენტი, ვინც ჩააბარებს სერთიფიკაციას, ხელფასი 1000 ლარამდე გაეზრდება", _ აღნიშნა პრეზიდენტმა.

მისი თქმით, მართალია, ეს არ მოაგვარებს ჩვენი პედაგოგების ყველა პრობლემას, მაგრამ იმის გარანტიას მაინც შექმნის, რომ ღირსეული მასწავლებელი რაღაც დონეზე მაინც ადეკვატურად იყოს ანაზღაურებული.
ghn